Þetta er hann Aðalsteinn sem margir muna eftir sem Alla. Sýnist hann vera með eitthvað óhreint í pokahorninu, það er allavega einhver sakamannasvipur á kauða.
Þessa mynd sendi Ástráður oft kallaður Billi, af Ragnari á röltinu í einhverju skólaferðalaginu. Þarna má sjá Ingvar leikfimikennara í baksýn og það sést meira að segja grilla í mottuna.
Óskar Hafliði fór á kostum í þessum leik og það varð hreinlega allt vitlaust í skálanum.
Óskar Sig og Valur örþreyttir eftir erfiðan dag í brekkunum. Sýnist Óskar vera að drepast í rassinum, hefur líklega dottið einum of oft enda ekki mjög burðugur á skíðum.
Hákon, Valur, Elías, Svavar, Tómas, Brynjar, Þorsteinn, Finnbogi, Borgar, Davíð og Sigurður eftir velheppnaðan knattspyrnuleik í Þórsmörk.
Stelpurnar frekar léttklæddar og komnar í pokann og strákarnir standa eins og hrægammar yfir þeim og einn farinn að gæla við snákinn. Hvurn fjandann er Ægir að gera, jóðla ástarvísur?
Þessa bekkjarmynd sendi Hjölli einnig. Ég man ekki hvaða bekkur þetta er en það eru nokkur kunnugleg andlit á þessari mynd. Hermann, Ólafur, Gunni, Finnbogi, Rakel, Rósa, Þórunn, Elín, Guðrún Sóley, Bjarni, Borgar, Brynjar, Hlynur, Valur, Katrín, Íris, Sævar, Hjörleifur, Gummi, Auður, Steinunn Alda, Birna. Kennari Þóra Flygenring.
Þessa mynd sendi Hjölli frá Noregi. Þarna eru Svenni og Gunni með Þórdísi Móses á milli sín. Ekki veit ég hvurn fjárann þeir eru að gera en ég get mér til að þeir hafi óhreint mjöl í pokahorninu. Hvað eru þeir með á hausnum, átti þetta að vera töff eða er þetta grín? Sé að Gunni er í DonCano galla sem var klassíker á þessum tíma. Man að ég keypti mér Don Cano galla fyrir mánaðarlaun í unglingavinnunni.
Vill endilega minna fólk á að skrá sig í tíma, annað hvort í síma eða á rafrænu formi með e-pósti.
Þessir pörupiltar ákváðu upp á sitt einsdæmi að gefa skít í skólayfirvöld með því að bera á sér þjóhnappana í Þórsmörk. Þeir höfðu þó ekki erindi fyrir erfiðið enda öllum skítsama um skítuga þjóhnappa. Heyrst hefur að Brynjar, Svavar og Finnbogi ætli sér að endurtaka leikinn á endurfundum okkar þann 17. nóvember og því til mikils að hlakka.
Elías var heldur ekki mikið fyrir að láta mynda sig. Hér reynir hann að henda grús í myndatökumanninn, hvílík heift! Takið vel eftir hekluðu vestispeysunni sem Sprelías er í, hann heklaði þetta sjálfur helv.. melurinn.
Eins og flestir vita þá var Elías Óskar Illugason frekar tæpur á þessum árum. Hann átti það til að liggja á göngunum í Víðistaðaskóla og betla peninga fyrir snúð og allskyns óþvera. Hér er hann í skólaferðalagi að betla pening fyrir sítrónu Svala (meiri vitleysingurinn).
Greinilega eitthvað í gangi þarna. Finnbogi að láta Steinu vita að hann sé til í tuskið með því að ýta duglega í hana öxlinni. Já menn komu skilaboðum með ýmsu móti til skila í þá daga með misjöfnum árangri þó. Held að þessi aðferð hjá Finna hafi nú ekki gengið upp, en hvað veit ég.
Finnbogi Gylfason bregður hér fyrir sig hinni alræmdu kímnigáfu og læst vera skelfingu lostið hreindýr. Svona var tarfurinn sem ég skaut á Grænlandi í sumar á svipinn þegar ég hafði skotið af honum vinstra hornið.
Ekki fyrir svo mörgum árum síðan hitti ég Einar sundkennara á förnum vegi og hann tjáði mér að hann ætti í fórum sínum flotta mynd af mér og fleiri krökkum. Ég gaf honum heimilisfangið mitt og hann sendi þessa mynd á mig, og hér er hún nú. Þetta er sem sagt mynd af Sigga Hilmars, Katrínu, Ægi, Óskari Sig og Írisi. Takiði eftir slikkernum sem er á hjólinu hjá mér, keypti hann í Músík og Sport á fimmhundruð kall ásamt Kiss Killers plötu.
